Mjög gestkvæmt hefur verið í Þórbergssetri í allan vetur og vor. Eru það erlendir ferðamenn sem dvelja á Hala í 1 - 4 nætur og ferðast um svæðið í kring og heimsækja Jökulsárlón og Skaftafell. Aðaláhugamálið hefur verið að sjá norðurljós, en hægt var að sjá þau flestar nætur sem heiðskírt var er líða tók á vetur. Loksins er nú búið að gefa út eina af bókum Þórbergs á þýsku. Það er Íslenskur aðall og nú er loksins hægt að kynna þetta verk Þórbergs fyrir þýskumælandi ferðamönnum, en þeir hafa sýnt sýningunni mikinn áhuga. Steinarnir tala koma út á ensku í vor, enskir textar eru komnir á sýningarspjöldin og í sumar verður sett upp nýstárleg ljósmyndasýning í Þórbergssetri, þar sem textar Þórbergs kallast á við náttúrumyndir úr umhverfinu.
Allt þetta þýðir vonandi að erlendir ferðamenn geti betur tileinkað sér anda sýningarinnar og notið þess betur að staldra við um stund í Þórbergssetri. Í sumar hefur verið ráðinn bókmenntafræðingur sem mun annast leiðsögn um safnið á erlendum tungumálum en vitaskuld eru Íslendingar alltaf velkomnir líka að skoða sýningarnar og alltaf er eitthvað nýtt að sjá. 

Í maí eru  fjallgöngugarpar á ferli um Suðursveit. Vinsælast er að klífa Þverártindsegg sem er í um 1550 metra hæð. Helgina 5.- 6. maí dvöldu um 50 manns á Halabæjunum, fóru þeir á Þverártindsegg á laugardeginum í blíðskaparveðri og héldu síðan upp á daginn með veisluhöldum í Þórbergssetri um kvöldið. Þennan dag var sett met á Þverártindsegginni því alls munu hafa farið þar upp um 80 manns. Næstu helgar er von á fleiri hópum og því mikið um að vera.

Í maímánuði er Þórbergssetur opið alla daga frá klukkan 9 á morgnana til klukkan  8 á kvöldin. Tekið er á móti sérpöntunum og fyrirspurnum á netfangið Þetta netfang er varið fyrir ruslrafpósti, þú þarft að hafa Javascript virkt til að skoða það  eða í síma 478 1078 . Hægt er fá leiðsögn um safnið.