Skemmtileg Söguferð í Suðursveit
Laugardaginn 13. júlí s.l. fór hópur fólks í "Söguferð með Þórbergi" en svo nefnist ratleikur fyrir alla fjölskylduna sem komið hefur verið upp í nágrenni Hala í Suðursveit. Tilefnið var kynning á verkefninu og Þórbergssetri sem fyrirhugað er að koma á fót á Hala. Söguferð með Þórbergi er fyrir alla fjölskylduna; aðeins þarf að byrja á fyrsta skiltinu sem stendur við áningarstaðinn við þjóðveginn ofan við Hala.
Það er stórskemmtilegt að ganga um slóðir Þórbergs og fræðast um náttúruna, örnefnin og söguna á litlum skiltum, sem haganlega hefur verið komið fyrir á steinum úti í náttúrunni. Fjölnir og Þorbjörg á Hala hafa haft veg og vanda af leiknum. Með í för á laugardaginn var Torfhildur Hólm Torfadóttir á Hala, en sem barn fór hún oft með Þórbergi í söguferðir um nágrennið, eða landkynningarferðir eins og Þórbergur kallaði þær.