Minnisvarði á Hala

Í dag 12. mars er afmælisdagur Þórbergs Þórðarsonar. Í tilefni af því er flaggað ,,upp við steina" en þar er minnisvarði um bræðurna Þórberg, Steinþór og Benedikt Þórðarsyni frá Hala í Suðursveit

Minnisvarðinn stendur við þjóðveginn ofan við Halabæina og er þar viðkomustaður fjölmargra ferðamanna. Í dag birtum við ljóð sem Torfhildur Hólm Torfadóttir sonardóttir Steinþórs Þórðarsonar orti í tilefni af vígslu minnisvarðans 10. júní 1992.          

Minnisvarði

Heyrið nú þyt frá löngu liðnum dögum                
leggið við hlustir, hvíslar létt í blænum.
Glæðist þá lífi grein úr gömlum sögum,
glitskýin sigla yfir Halabænum.

Berst oss úr fjarska bergmál fóta smárra,
bræðranna þriggja, hér um götur hlupu.
Fóstraðir voru í faðmi fjalla hárra,
á frísklega stráka perlur himins drupu.

Þeir uxu úr grasi, andans máttinn fengu
umvafðir hlýju styrkrar móðurhandar.
Fótsporin fyrstu með föður sínum gengu,
fundu hve golan létt á vanga andar.

Fegurð og æska full af vonum björtum,
fyllti þá krafti í byrjun nýrrar aldar.
Eldmóður lífsins brann í ungum hjörtum,
arfleifðir menningar voru í sálu faldar.

Með hugsjón í nesti var haldið fram á veginn,
hvar skyldi æja og stóra hluti vinna.
Það bætir hvern mann að trúa á mátt og meginn,
merkin að bera í krafti feðra sinna.

Áfram var haldið ofurhugans verki,
andans flug tekið, hátt á vængjum svifið.
Suðursveit þeirra mun bera sigurmerki,
og sýna hvað vinnst þegar nógu hátt er klifið.

Ekkert mun breytast, tímahjólið tifar,
tignarlegt fjallið ennþá skýlir Hala.
Eilífðin ykkar ævisögur skrifar
á steinana þrjá, steinana sem tala.

Torfhildur Hólm Torfadóttir