Hafnarskóli í heimsókn
Það var líf og fjör í Þórbergssetri síðastliðinn þriðjudag en þá komu um 80 nemendur og kennarar Hafnarskóla í heimsókn á Hala. Dvöldu þau í 4 - 5 klukkutíma og höfðu mikið við að vera. Skipt var í hópa og voru mismunandi viðfangsefni á hevrjum stað. Farið var í ratleik um umhverfið þar sem sögur úr verkum Þórbergs var að finna á leiðinni. Einnig var farið í fiskeldið og jöklableikjurnar skoðaðar jafnt stórar sem smáar, sprelllifandi á sundi. Ekki var laust við að kæmi veiðihugur í suma. Farið var í fjárhúsin og nýfæddum lömbum heilsað og svo í fjósið og kannað hvernig kýr og kálfar hefðu það. Nemendum gafst síðan tími til að fara aftur í tímann um 110 - 120 ár og setja sig í spor fólksins sem ólst upp í fjósbaðstofunni á Hala í lok 19 aldar. Spjallað var um rithöfunda og hvernig þeir geta með verkum sínum gefið horfnu fóli ævarandi líf á blaðsíðum bóka.